நீங்கள் தேடியது "மோசடி கைது"

திருமலை:

குண்டூர் மாவட்டம் வெங்கலபள்ளியை சேர்ந்த கார்த்திக் திருப்பதியில் தங்கி சுப்ரபாத சேவை டிக்கெட் வாங்கி தருவதாக பக்தர்களை ஏமாற்றி மோசடியில் ஈடுபட்டு வந்தார்.

ஐதராபாத்தை சேர்ந்த சீனிவாசராவ் என்ற பக்தர் கடந்த 1-ந் தேதி கார்த்திக்கை தொடர்பு கொண்டு சுப்ரபாத டிக்கெட் வேண்டும் என கேட்டிருந்தார். சீனிவாசராவிடம் தன்னுடைய வங்கிக் கணக்கில் பணம் செலுத்தினால் டிக்கெட் வாங்கி தருகிறேன் என்று கார்த்திக் கூறினார்.

இதையடுத்து கார்த்திக்கின் வங்கிக்கணக்கில் சீனிவாசராவ் 5 ஆயிரத்து 300 ரூபாயை செலுத்தினார்.

ஆனால் திருமலைக்கு சீனிவாசராவ் வந்தபோது சுப்ரபாத சேவை டிக்கெட் வாங்கி கொடுக்காமல் கார்த்திக் ஏமாற்றிவிட்டார்.

இதனால் அதிர்ச்சியடைந்த சீனிவாசராவ் திருமலையில் உள்ள தேவஸ்தான விஜிலென்ஸ் அதிகாரி ராமகிருஷ்ணாவிடம் கார்த்திக்கின் மோசடி குறித்து புகார் அளித்தார். திருமலை 2-வது நகர போலீஸ் நிலையத்தில் வழக்குபதிவு செய்யப்பட்டது.

ஏ.எஸ்.பி. மகேஸ்வரராஜி, டி.எஸ்.பி. சிவராம ரெட்டி, இன்ஸ்பெக்டர் ராமகிருஷ்ணா மற்றும் போலீசார் கார்த்திக்கின் ஆதார் எண் மற்றும் செல்போன் எண் ஆகியவற்றின் அடிப்படையில் விசாரணை நடத்தினர்.

கார்த்திக் குண்டூர், தெனாலி, ஏலூர் ஆகிய இடங்களில் நடமாடியது தெரியவந்தது. சப்-இன்ஸ்பெக்டர் தர்மாரெட்டி தலைமையில் போலீசார் கார்த்திக்கை தெனாலியில் கைது செய்து திருமலைக்கு அழைத்து வந்தனர்.

அவரிடம் நடத்திய விசாரணையில் திருமலையில் உள்ள மடங்கள் மற்றும் இடைத்தரகர்களுடன் தொடர்பு வைத்துக் கொண்டு 400க்கும் மேற்பட்ட பக்தர்களை ஏமாற்றி வந்தது தெரியவந்தது.

கார்த்திக்கின் பின்னணியில் வேறு யார், உள்ளனர் என்பது குறித்து விசாரணை நடந்து வருகிறது. அவர்கள் மீதும் வழக்கு தொடரப்பட்டு கைது செய்யப்படுவார்கள் என போலீசார் தெரிவித்தனர்.

சென்னை:

சென்னையில் போலி ஏ.டி.எம். கார்டுகளை பயன்படுத்தி கைவரிசை காட்டுவது தமிழகம் முழுவதும் தொடர்ச்சியாக நடந்து வருகிறது.

வங்கி கணக்கில் அதிக அளவில் பணம் வைத்திருப்பவர்கள் யார் என்பதை கண்டு பிடித்து அவர்களின் பின் நம்பரை பயன்படுத்தி புதிய கார்டு தயாரித்து இந்தமோசடி அரங்கேற்றப்படுகிறது.

ஏ.டி.எம். மையங்களில் ஸ்கிம்மர் கருவி பொருத்தி ஏ.டி.எம். கார்டு மூலம் பணம் எடுப்பவர்களின் ரகசியங்களை திருடி போலி கார்டு தயாரித்து மோசடி செய்யப்படுகிறது.

வணிக நிறுவனங்களில் பொருள் வாங்கி விட்டு கார்டுகள் மூலம் பணம் செலுத்தும் போது அவர்களின் ரகசிய பின் நம்பர் திருடப்பட்டு போலி கார்டு தயாரிக்கப்படுகிறது. அதன் மூலம் அவர்களின் வங்கி கணக்கில் இருந்து பணம் மோசடி செய்யப்படுகிறது.

இதுதொடர்பாக பல வணிக நிறுவனங்கள் மீது சென்னை போலீசார் ஏற்கனவே நடவடிக்கை எடுத்துள்ளனர். வங்கிகள், கூரியர் மூலம் வாடிக்கையாளர்களின் முகவரிக்கு ஏ.டி.எம். கார்டு மற்றும் பின் நம்பரை அனுப்பி வைக்கும் போது அதை பிரித்து பார்த்து பின் நம்பரை தெரிந்து கொண்டு அதற்கேற்ப போலி ஏ.டி.எம்.கார்டுகள் தயாரித்து மோசடி செய்வதும் கண்டுபிடிக்கப்பட்டது. இதுபோன்ற மோசடியில் ஈடுபட்ட தமிழகத்தை சேர்ந்த பலர் கைது செய்யப்பட்டுள்ளனர்.

இந்த நிலையில் வடமாநிலத்தை சேர்ந்த ஒரு கும்பல் சென்னை ஓட்டலில் தங்கி போலி ஏ.டி.எம். கார்டு மூலம் பணம் மோசடி செய்திருப்பது கண்டு பிடிக்கப்பட்டது.

அந்த கும்பலில் ஜார்கண்ட் மாநிலத்தை சேர்ந்த விஜய்குமார் மண்டல் (வயது 22), சுகேந்தர் குமார் மண்டல் (23), பாஸ்கர் குமார் (25) ஆகியோர் இருந்தனர். இவர்கள் திருவல்லிக்கேணி சேப்பாக்கம் சாலையில் உள்ள ஒரு ஓட்டலில் தங்கியிருந்து கைவரிசை காட்டி உள்ளனர்.

கொல்கத்தாவில் இருந்து வந்த சைபர் கிரைம் போலீசார் ஓட்டலில் தங்கியிருந்த 3 பேரையும் கைதுசெய்தனர். பின்னர் அவர்களை திருவல்லிக்கேணி போலீஸ் நிலையத்தில் ஒப்படைத்தனர். அவர்களிடம் இருந்து ரூ.25 லட்சம் ரொக்க பணம் மற்றும் 21 போலி ஏ.டி.எம். கார்டுகள் பறிமுதல் செய்யப்பட்டன.

போலி ஏ.டி.எம். கார்டுகளை பயன்படுத்தி அவர்கள் இந்த பணத்தை எடுத்திருப்பது தெரிய வந்தது. அவர்கள் கொல்கத்தா உள்ளிட்ட வட மாநிலங்களிலும் கைவரிசை காட்டி உள்ளனர்.

அதன் பேரிலேயே கொல்கத்தாவில் இருந்து வந்த சைபர் கிரைம் போலீசார் அவர்கள் 3 பேரையும் கைது செய்துள்ளனர். அவர்கள் வேறு எங்கெங்கெல்லாம் கைவரிசை காட்டி உள்ளனர் என்பது தொடர்பாக விசாரணை நடந்து வருகிறது.

சென்னை:

சென்னை சூளை அங்காள அம்மன்கோவில் தெருவில் அண்ணாமலை சாமி என்பவர் அரிசி மொத்த வியாபாரம் செய்து வருகிறார்.

அவரிடம் பெரம்பூர் ஸ்டீபன்சன் ரோடு, வடக்கு டவுன் பகுதியை சேர்ந்த பரத்ஷா (59)வும், அவரது கூட்டாளிகளும் அணுகி குரோம்பேட்டையில் கேட்டரிங் தொழில் செய்து வருவதாகவும், அதற்கு அரிசி மொத்த விலைக்கு தேவைப்படுவதாகவும் கூறினர்.

அதனை நம்பி அண்ணாமலைசாமி அரிசி மூட்டைகளை கொடுத்துள்ளார். 6 மாதங்களுக்கு தேவையான அரிசியை மொத்தமாக அனுப்பியுள்ளார். அந்த தொகைக்கு பரத்ஷா பணம் தராமல் இழுத்தடித்துள்ளார்.

அதன் பின்னர் காசோலை கொடுத்து அதுவும் வங்கியில் பணம் இல்லாமல் திரும்பி வந்து விட்டது. அதனை தொடர்ந்து கேட்டரிங் நிறுவனத்தின் முகவரிக்கு சென்று அண்ணாமலைசாமி விசாரித்த போது அப்படி ஒரு நிறுவனமே இல்லை என்று தெரிய வந்தது.

இதையடுத்து அவர் சென்னை மத்திய குற்றப் பிரிவில் புகார் கொடுத்தார். புகாரின் பேரில் உதவி கமி‌ஷனர் எஸ்.முத்து வேல்பாண்டி மேற்பார்வையில் சப்-இன்ஸ்பெக்டர் கோவிந்த ராஜுலு தலைமையில் தனிப்படை அமைக்கப்பட்டது. போலீசார் தலைமறைவாக இருந்த பரத்ஷா மற்றும் அவரது கூட்டாளியை தேடி வந்தனர்.

கேட்டரிங் நிறுவனமே நடத்தாமல் அரிசியை மொத்தமாக வாங்கி வியாபாரிகளிடம் ரூ.62 லட்சத்து 80 ஆயிரம் மோசடி செய்த பரத்ஷாவை நேற்று முன்தினம் போலீசார் கைது செய்தனர். அவர் அல்லிகுளம் நீதிமன்றத்தில் ஆஜர்படுத்தப்பட்டு புழல் சிறையில் அடைக்கப்பட்டார்.

திருவள்ளூர்:

திருவள்ளூர் பூங்காநகரை சேர்ந்தவர் ரவிச்சந்திரன். இவரது மனைவி சந்திரகுமாரி, மகள் குமுதவல்லி. இவர்கள் ஏல சீட்டு நடத்தி வந்தனர்.

இவர்களிடம் அதே பகுதியை சேர்ந்த மணி என்பவர் மாத தவணை முறையில் பணம் கட்டி வந்தார். சீட்டு முடிந்த பின்பும் மணிக்கு பணத்தை அவர்கள் திரும்ப கொடுக்கவில்லை. பலமுறை கேட்டும் பயன் இல்லை.

இதுகுறித்து மணி திருவள்ளூர் மாவட்ட போலீஸ் சூப்பிரண்டு சிபி. சக்கரவர்த்தியிடம் புகார் கொடுத்தார். இந்த மனு மீது வழக்கு பதிவு செய்து உரிய நடவடிக்கை எடுக்குமாறு அவர், மாவட்ட குற்றப்பிரிவு போலீசாருக்கு உத்தரவிட்டார்.

இதையடுத்து, மாவட்ட குற்றப்பிரிவு இன்ஸ்பெக்டர் அனுமந்தன் வழக்கு பதிவு செய்து விசாரணை நடத்தினார். இதில் 10-க்கும் மேற்பட்டவர்களுக்கு ரூபாய் 34 லட்சத்து 33 ஆயிரம் கொடுக்காமல் மோசடி செய்தது தெரியவந்தது.

இதையடுத்து குற்றப் பிரிவு போலீசார் சீட்டு பண மோசடி செய்த ரவிச்சந்திரன், சந்திரகுமாரி ஆகிய இருவரையும் கைது செய்தனர். பின்னர் திருவள்ளூர் நீதிமன்றத்தில் ஆஜர்படுத்தி சிறையில் அடைக்கப்பட்டனர். மேலும் ரவிச்சந்திரன் மகள் குமுத வல்லியை போலீசார் தேடி வருகின்றனர்.